Zaqatala rayonunda “Vətəndaşlıq məsələlərinin həlli və bu istiqamətdə görülmüş işlər” mövzusunda görüş keçirilib

Şəki  regional  miqrasiya  idarəsinin  xidməti  ərazisinə  aid  olan Zaqatalada əhalinin miqrasiya qanunvericiliyi  sahəsində  maarifləndirilməsi məqsədilə “Vətəndaşlıq məsələlərinin həlli və bu istiqamətdə görülmüş işlər” mövzusunda rayonun şəhər, qəsəbə və kənd inzibati ərazi dairəsi üzrə  nümayəndələrin, əcnəbi və vətəndaşlığı olmayan şəxslərin və vətəndaşların iştirakı  ilə  tədbir keçirilib. Tədbir iştirakçılarına ölkəmizdə miqrasiya proseslərinin tənzimlənməsi, idarə olunması sahəsində “bir pəncərə” prinsipi üzrə vahid dövlət orqanının səlahiyyətlərini həyata keçirən Dövlət Miqrasiya Xidmətinin fəaliyyəti barədə geniş məlumat verilib. Bildirilib ki, Dövlət Miqrasiya Xidməti fəaliyyətini insan və vətəndaş hüquq və azadlıqlarına hörmət, qanunçuluq və humanizm prinsipləri əsasında həyata keçirir və hər zaman miqrantların hüquqlarının qorunmasına xüsusi önəm verir. Görüşdə, həmçinin əcnəbilərin və vətəndaşlığı olmayan şəxslərin olduğu yer üzrə qeydiyyatı, müvəqqəti olma, müvəqqəti və daimi yaşama, iş icazələrinin verilməsi və müddətlərinin uzadılması, vətəndaşlıq məsələləri ilə bağlı Xidmət tərəfindən görülən işlər barədə müvafiq məlumatlar verilib. Diqqətə çatdırılıb ki, əcnəbilər Dövlət Miqrasiya Xidmətinə, Xidmətin regional idarələrinə müraciət edib ölkə ərazisində müvəqqəti olmalarını, yaşamalarını leqallaşdırmalı, fəaliyyətlərini qanuni əsaslarla həyata keçirməli, bu sahədə mövcud olan qanunlarımızı bilməli və ona riayət etməlidirlər.

Nazirlər Kabinetinin 2015-ci il 18 mart tarixli  84 nömrəli qərarı ilə təsdiq edilmiş “Şəxsin Azərbaycan Respublikasının vətəndaşlığına mənsubiyyətinin müəyyənləşdiril-məsi Qaydası”na əsasən şəxsin Azərbaycan Respublikasının vətəndaşlığına mənsubiyyətinin tanınması üçün əsas olan hallar barədə ətraflı söhbət açılıb.

Elə həmin gün  əcnəbi  və  vətəndaşlığı olmayan  şəxslər tərəfindən Dövlət Miqrasiya Xidmətinə edilən bütün növ müraciətlərin qəbulunu  yerində  və  operativ şəkildə həyata keçirmək məqsədi  ilə  Zaqatala rayonunda  səyyar xidmət təşkil olunub. Keçirilmiş maarifləndirmə tədbirində  iştirak edən 85 nəfərdən 49-u səyyar xidmətin imkanlarından istifadə edib. Onlardan 6 nəfərindən Azərbaycan Respublikasının vətəndaşlığına mənsubiyyətinin müəyyənləşdirilməsi, 1 nəfərindən  Azərbaycan Respublikasının  vətəndaşlığına qəbulla bağlı sənədlər qəbul edilib. Həmçinin 11 şəxsə Azərbaycan Respublikasının ərazisində müvəqqəti yaşamaq üçün icazə vəsiqələri, 9 nəfərə vətəndaşlıq mənsubiyyətinin müəyyən olunması ilə bağlı arayış verilib. Bundan başqa, 22 şəxsə vətəndaşlıq mənsubiyyətinin müəyyənləşdirilməsi, müvəqqəti, həmçinin daimi yaşama, o cümlədən iş icazələrinin alınması ilə bağlı məlumat verilib  və müraciət etmək üçün sənədlərin siyahısı təqdim olunub.