Xəbərdarlıq və toplanış üzrə mülki müdafiə məşqi keçirilib

“Azərbaycan Respublikası Dövlət Miqrasiya Xidmətinin 2025-ci il üçün Mülki Müdafiə Tədbirlər Planı”nın icrası ilə əlaqədar, mülki müdafiə dəstələrinin komandir-rəis və şəxsi heyəti ilə “Hərbiləşdirilməmiş mülki müdafiə dəstələri ilə xəbərdarlıq toplanış üzrə mülki müdafiə məşqi” təşkil edilərək keçirilib.

Tədbir zamanı əməkdaşlar Dövlət Miqrasiya Xidmətinin müllki müdafiə dəstələrinin vəzifələri barədə məlumatlandırılıb, sonra onların xidməti yerlərinə getməsi ilə bağlı tapşırıq verilib və müəyyən vaxt ərzində növbətçi hissədə quraşdırılmış səsgücləndirici və yanğın alarm qurğuları işə salınaraq “Toplanış” siqnalı ilə əsas toplanış meydanında toplanmaları təmin edilib. Daha sonra Xidmətin inzibati binasında və Tibb müəssisəsində yanğınsöndürən dəstə üzvləri tərəfindən şərti yanğınla bağlı məşq keçirilib, yanğınsöndürən su şlanqlarından istifadə etməklə onların vəziyyəti yoxlanılıb və praktiki olaraq icra olunub.

Bununla yanaşı işçilərə Dövlət Miqrasiya Xidmətinin inzibati binasında baş verə biləcək hadisələr zamanı dəstələrin fəaliyyətinin nədən ibarət olacağı, onların operativ reaksiyası və digər əməkdaşların inzibati binadan təhlükəsiz əraziyə təxliyəsinin həyata keçirilməsi təkrar izah edilib.