Dövlət Miqrasiya Xidməti yanında İctimai Şuranın üzvləri Şəki şəhərinə səfər ediblər

Dövlət Miqrasiya Xidməti yanında İctimai Şuranın üzvləri Xidmətin müxtəlif struktur bölmələri tərəfindən miqrasiya proseslərinin həyata keçirilməsi vəziyyəti ilə yaxından tanış olmaq üçün mütəmadi olaraq görüşlər təşkil edirlər.

Növbəti tədbir çərçivəsində İctimai Şura üzvləri Şəki regional miqrasiya idarəsində olublar. Onlara regional idarənin əhatə etdiyi rayonlarda əcnəbi və vətəndaşlığı olmayan şəxslərin hüquqlarının müdafiəsi və onların ölkə ərazisində qanuniləşdirilməsi istiqamətində görülən işlər, elektron xidmətlər, mütəmadi təşkil edilən səyyar xidmətlər, keçirilən maarifləndirmə tədbirləri və digər fəaliyyət istiqamətləri barədə məlumat verilib.

Eyni zamanda səfər çərçivəsində Şura üzvləri Şəki “ASAN Həyat” kompleksində ümumi işin təşkili, miqrasiya və digər əlaqəli pəncərələrin fəaliyyəti ilə də tanış olublar.