Dövlət Miqrasiya Xidmətinin rəisi Vüsal Hüseynov üçüncü “Yüksəliş” müsabiqəsinin qalibi ilə görüşüb

Dövlət Miqrasiya Xidmətinin rəisi, II dərəcəli dövlət miqrasiya xidməti müşaviri Vüsal Hüseynov üçüncü “Yüksəliş” müsabiqəsinin qalibi Emil Bəşirovla görüşüb.

Xidmət rəisi, müsabiqənin Təşkilat Komitəsinin qərarına əsasən qaliblər üçün tərtib olunmuş Mentorluq Proqramını uğurla başa vurması ilə əlaqədar qonağı təbrik edib, mentorluq proqramı çərçivəsində görülən işlərə, keçirilən görüşlər və tədbirlərə, həmçinin Emil Bəşirovun fərdi inkişaf planına nəzər salınıb, bu sahədə qazandığı biliklər barədə fikir mübadiləsi aparılıb.     

Emil Bəşirov mentorluq proqramı çərçivəsində həyata keçirilmiş fəaliyyətlərin faydalı olmasından məmnunluğunu ifadə edib, qurumun fəaliyyət istiqamətləri barədə ətraflı məlumat əldə etdiyini, bir sıra tədbirlərdə yaxından iştirak etdiyini vurğulayaraq mentorluq proqramı zamanı ona göstərilən dəstəyə görə təşəkkürünü bildirdib.

Qeyd edək ki, Dövlət Miqrasiya Xidmətinin rəisi, II dərəcəli dövlət miqrasiya xidməti müşaviri Vüsal Hüseynov üçüncü “Yüksəliş” müsabiqəsinin qalibi Emil Bəşirovun mentorudur.

Xatırladaq ki, “Yüksəliş” müsabiqəsi Azərbaycan Respublikasının Prezidenti cənab İlham Əliyevin 26 iyul 2019-cu il tarixində imzaladığı Sərəncamla təsis olunub. Sayca dördüncü “Yüksəliş” müsabiqəsinin keçirilməsi ilə bağlı Azərbaycan Respublikasının Prezidenti cənab İlham Əliyev tərəfindən 25 dekabr 2023-cü il tarixində müvafiq Sərəncam imzalanıb.